Yadda AI ya kunyata ma’aikatar harkokin wajen Amurka a taron yaƙi da ƙanjamau

Ma’aikatar Harkokin Wajen Amurka ta nema a yi mata afuwa a hukumance, bayan wani bidiyo da aka gabatar a taron ƙasa da ƙasa kan cutar kanjamau ta 2026 ya nuna wata taswirar Afirka mai cike da kurakurai.

An yi amfani da manhajar OpenAI ne wajen samar da taswirar.

Taswirar ta ta yi kuskuren sanya wasu ƙasashen Afirka su a ɓangarorin nahiyar da ba nasu ne ba.

Gabatarwar, wadda babban wakilin lafiya na Amurka Jeff Graham ya jagoranta game da Shirin Gaggawa na Shugaban Amurka kan rage radadin cutar ƙanjamau (wato PEPFAR), an yi ta ne don ƙulla yarjejeniyoyin samar da kuɗaɗe don yaƙar cutar.

Sai dai, mahalarta taron sun sha mamakin ganin mummunan karkacewar bayanai.

An nuna cewa babbar gabar teku ta Najeriya tana cikin hamadar Sahara ne, yayin da aka kai Mozambique wadda ke kudu maso gabashin nahiyar zuwa dubban mil a arewacin Afirka.

Taswirar ta mayar da Ivory Coast gaba ɗaya zuwa gabashin Afirka, yayin da Malawi da Uganda aka nuna su da iyakokin da ba a iya gane inda suke ba samsam.

Wani bita da Reuters ta yi daga baya ya gano wani alamar sirri ta OpenAI da aka saka a cikin hoton, wanda ya nuna cewa an samar da hoton ta hanyar kayan aikin AI ne kuma babu wani mutumin da ya tace sahihancin taswirar gabanin wallafa ta.

Abin takaicin ya bazu cikin sauri a X da LinkedIn, wanda ya jawo suka cikin gaggawa daga jami’an diflomasiyyar Afirka da ƙwararru a fagen manufofin ƙasashen waje waɗanda suka kira batun na rashin girmamawa da rashin ƙwarewa.

A can birnin Washington kuwa, tsoffin ƴan siyasa da mambobin Majalisar Dokoki sun ce ƙarancin ma’aikata ne a tushen kurakuran.

Sanata Jeanne Shaheen ta soki lamarin a bainar jama’a, tana gargaɗin a daina barin “AI ya gudanar da ayyukan diflomasiyya.”

Mai magana da yawun Ma’aikatar Harkokin Waje ta bayyana cewa hukumar ta ɗauki “cikakken alhakin ruɗani da kuskuren da ta haifar,” tana mai cewa “kuskure ne mara daɗi”.