Sojojin Najeriya sun ce sun ƙwato shanu sama da 500 bayan sun daƙile wani yunƙurin satar su a jihar Kaduna.
An gudanar da wannan aiki ne a ranar Talata a wani yanki na karamar hukumar Igabi, a cewar rundunar haɗin gwiwa ta Arewa maso Yamma, wato Operation Fansan Yamma.
Rundunar ta ce sojoji sun amsa kiran gaggawa daga mazauna yankin waɗanda suka sanar da su rahoton satar shanu a Rugar Mande Kurmin.
Ta kuma ce sojoji sun koma hanyoyin da ake kyautata zaton maharan sun yi amfani da su wajen kora shanun sannan suka yi kwanton ɓauna.
Sojojin sun ce sun yi nasarar fatattakar wadanda ake zargin barayin shanun ne, inda suka tilasta musu ja da baya, kuma suka bar shanun.
Daga baya an mayar da dabbobin da aka kwato ga masu su, a cewar rundunar.
Satar shanu matsala ce da ta dade a arewacin Najeriya kuma ana danganta ta da rashin tsaro da ya shafi kungiyoyi masu dauke da makamai da ƴan fashi da makami da kuma takaddama kan filaye da kiwo.
Rundunar hadin gwiwa ta bukaci mazauna yankin da su ci gaba da bai wa hukumomin tsaro bayanai game da waɗanda ake zargi da aikata laifuka.
Ta ce irin wannan haɗin gwiwa zai taimaka wa sojoji wajen wargaza ƙungiyoyi masu ɗauke da makamai da suka addabi arewa maso yammacin Najeriya.
An fitar da wannan sanarwar ne a ranar Laraba ta hannun Laftanar Kanar Aliyu Danja, jami’in yaɗa labarai na rundunar.
