‘Yan sandan Gambia sun harba hayaƙi mai sa hawaye domin tarwatsa zanga-zangar da aka yi a daren jiya a birnin Banjul da kewaye, yayin da fushin jama’a kan matsalar katsewar wutar lantarki na tsawon makonni ya tilasta wa mutane fita kan tituna domin nuna ɓacin ransu.
Shaidu sun ce masu zanga-zangar sun ƙona tayoyi tare da kafa shingaye a sassa daban-daban na babban birnin kasar, ciki har da kusa da fadar Shugaba Adama Barrow, inda suke ta rera waƙoƙi suna kiran ya sauka daga muƙaminsa.
A yankin Farato, jama’a sun taru a wajen gidan Mataimakin Shugaban Kasa Mohammed B.S. Jallow tare da yayyage allunan talla na ofishin jam’iyya mai mulki ta National People’s Party; lamarin da ke nuna yadda takaicin jama’a ya bazu har zuwa wuraren da ba babban birnin ƙasar ba.
Wasu mazauna yankin sun ce wutar lantarki ta ɗauke na tsawon sa’a 48 a jere a wannan lokaci na yanayi mai zafi. Wani mazaunin Banjul, Ousainu Jammeh, ya shaida wa kamfanin dillancin labarai na Reuters cewa hayaƙi mai sa hawayen ya kai har gidansa, lamarin da ya sa ya shiga cikin masu zanga-zangar.
Wannan rikici ya zo ne ƴan watanni kafin zaben shugaban kasa da aka tsara gudanarwa a watan Disamba, inda Barrow ke neman wa’adi na uku — yanayin da ya mayar da batun da a da ƙorafi ne kawai kan ayyukan gwamnati zuwa wata matsala ta siyasa a gare shi.
A yayin da yake jawabi ga al’ummar kasar, Barrow ya amince da wahalhalun da katsewar wutar ke haifarwa, tare da yin alƙawarin cewa za a samar da sabuwar na’urar samar da wutar lantarki mai karfin megawatt 24 kafin karshen watan Oktoba.
Hukumar samar da wutar lantarki ta kasar, NAWEC, ta dora alhakin matsalar kan ƙaruwar bukatar wutar lantarki da kuma matsalar fasaha a ɗaya daga cikin manyan na’urorinta na samar da wuta.
Ministan yaɗa labarai na Gambia ya nemi afuwa kan matsalar tare da bayyana rikicin daren jiya a matsayin abin “damuwa matuka,” yayin da jami’ai suka ce suna ƙoƙarin ganin an dawo da samar da wutar lantarki yadda ya kamata cikin gaggawa.
Zuwa safiyar ranar Talata, yanayin zirga-zirgar ababen hawa a Banjul ya koma yadda aka saba.
