NDLEA ta kama Tramadol na kusan naira biliyan 7
Hukumar Yaki da Sha da Fataucin Miyagun Kwayoyi ta Nijeriya (NDLEA) ta kama Tramadol mai nauyin kilo 8,725, wanda kuɗinsa ya kai sama da naira biliyan 6.98 a tashar jiragen ruwa ta Apapa da ke Legas.
Hukumar ta bayyana cewa an shigo da kayan ne daga ƙasar Indiya, kuma aka ayyana su a matsayin garin masara (maize starch) domin yaudarar jami’an tsaro.
Bayan gudanar da bincike na haɗin gwiwa tsakanin jami’an NDLEA da na Hukumar Kwastam, an gano buhuna 349 shake da hodar tramadol hydrochloride.
Kakakin hukumar NDLEA, Femi Babafemi, ya tabbatar da cewa wannan gagarumin kamu yana ɗaya daga cikin nasarorin da aka samu yayin wani samame da hukumar ta kaddamar a fadin kasar tsakanin 12 zuwa 17 ga watan Oktoba, 2026.
Binciken kimiyya a ɗakin gwaje-gwaje na hukumar ya tabbatar da cewa sinadarin na tramadol ne.
