Tsohon shugaban mulkin soja na Najeriya, Janar Ibrahim Babangida, ya musanta mallakar wani wurin hakar zinare a Jihar Neja, wurin da mutum 37 da ake zargin suna hakar ma’adinai ba bisa ka’ida ba suka mutu bayan jami’an tsaro sun kama su.
Wannan musantawa ta zo ne bayan ikirarin da wani mutum – wanda ya tsira da ransa mai suna Malam Babawo Tudun Nasera, ya yi na cewa tsohon shugaban kasar ne mamallakin wurin hakar ma’adanai, kuma ya ce shi ne ya umurci masu hakar ma’adinin da su ci gaba da aiki a wurin.
Sai dai wata sanarwa da ta fito ta hannun wakilinsa, Mahmud Abdulhameed, Janar Babangida ya bayyana zargin a matsayin “arya, rashin gaskiya, kuma mara tushe ko kadan,” inda ya jaddada cewa ba shi da wata alaka da aikin hakar ma’adinin.
An dai kama wasu mutum 37 ne, wadanda ma’aikata masu hako ma’adanai ne yayin wani aikin tabbatar da doka wanda hukumar NSCDC ta gudanar, kuma sun shafe kwana uku a tsare kafin a gano sun mutu.
Nasera ya ce kaninsa Salim mai shekara 17 yana cikin wadanda suka mutu, inda ya bayyana cewa matasan yankin suna aiki a wurin duk da hadarin da ke tattare da hakan saboda rashin wata hanyar ciyar da iyalansu.
Duk da cewa da farko hukumar NSCDC ta yi hasashen yiwuwar barkewar wata cuta, wadanda suka tsira sun yi zargin cewa cunkoso mai tsanani, zafi mai yawa, da rashin isasshen iska a wurin tsaren ne suka haddasa mutuwar mutanen.
Gwamnan Jihar Neja, Mohammed Umaru Bago, ya ce ba a sanar da hukumomin jihar ba kafin hukumar NSCDC ta gudanar da samamen, inda ya lura cewa yawancin wadanda suka mutu suna tsakanin masu shekara 14 zuwa 18 da haihuwa ne.
Gwamna Bago ya tabbatar da cewa likitoci sun fara gudanar da gwaje-gwaje tare da binciken kwararru domin gano ainihin musabbabin mutuwar tasu.
Janar Babangida ya mika sakon ta’aziyya ga iyalan wadanda suka mutu, tare da yaba matakin binciken da jihar ke dauka da kuma yin kira ga mazauna yankin da matasa su kwantar da hankalinsu yayin da hukuma ke ci gaba da gudanar da bincike.
Tuni dai hukumomin gwamnatin tarayya suka kafa wani kwamiti domin gudanar da bincike kan yanayin da ya shafi mutuwar mutanen a hannun hukumar NSCDC.
